Biriani ya biringanya

Chukua kontena la ukubwa wa wastani. Weka maji, kisha roweka mchele ndani ya hilo kontena lenye maji kwa muda wa dakika 30.

Chukua kikaango kidogo na ukiweke kwenye jiko lenye moto wa wastani, kisha acha kikaango kipate moto. Weka nazi iliyokunwa kwenye hicho kikaango, halafu kaanga bila kutumia mafuta huku ukikoroga na kutikisa kikaango mara kwa mara kwa muda wa dakika 1 mpaka 2, au hadi utakapo ona imebadilika rangi na kuwa na rangi ya kahawia, kisha epua na uweke pembeni ili ipoe.

Chukua mashine ya kusaga (blender). Weka kwenye hiyo mashine ya kusaga, nazi uliyo ikaanga, vitunguu swaumu, tangawizi, pamoja na vitunguu maji, kisha saga hadi utakapo ona mchanganyiko huo umesagika vizuri na kuwa laini.

Weka mbegu za giligilani, garam masala, pamoja na binzari ya manjano, kisha endelea kusaga hadi utakapo ona mchanganyiko huo wote umechanganyika vizuri.

Chukua sufuria kubwa lenye vijiko 2 vya chakula vya mafuta ya kupikia na uliweke kwenye jiko lenye moto wa wastani, kisha acha mafuta yapate moto. Weka kwenye hilo sufuria mchanganyiko ulio usaga, kisha kaanga huku ukikoroga mara kwa mara kwa muda wa dakika 5, au hadi utakapo ona imebadilika rangi na kuwa na rangi ya kahawia.

Weka biringanya, nusu ya chumvi, pamoja na ½ kikombe cha tui la nazi, halafu koroga vizuri, kisha weka moto mkubwa na uache ichemke kwa muda wa dakika 3.

Punguza moto na uweke moto wa wastani, halafu funika sufuria na uache iendelee kuchemka kwa muda wa dakika 15 mpaka 20, au hadi utakapo ona biringanya zimeiva na kuwa laini, kisha epua na uweke pembeni kwenye kontena.

Rudisha sufuria kwenye jiko. Weka kijiko 1 cha chakula cha mafuta ya kupikia kilichobaki, kisha acha mafuta yapate moto. Weka nyanya, majani ya minti, pamoja na majani ya giligilani, kisha pika mchanganyiko huo huku ukikoroga mara kwa mara kwa muda wa dakika 2, au hadi utakapo ona mchuzi umekuwa mzito.

Weka mchele, maji uliyotumia kurowekea mchele, nusu ya chumvi iliyobaki, pamoja na vikombe 1½ vya tui la nazi lililobaki, halafu koroga vizuri, kisha weka moto mkubwa na uache ichemke.

Ukiona imeanza kuchemka, punguza moto na uweke moto mdogo, kisha funika sufuria na uache iendelee kuchemka taratibu kwa muda wa dakika 10, au hadi utakapo ona maji yote kwenye sufuria yamekauka ila wali haujaiva. Hakikisha hukorogi kabisa wali wakati unaupika.

Ondoa nusu ya wali uliomo kwenye sufuria na uweke pembeni kwenye kontena.

Weka mchanganyiko wa biringanya ulioupika juu ya wali uliobaki kwenye sufuria, kisha sambaza vizuri.

Weka wali uliomo kwenye kontena juu ya mchanganyiko wa biringanya, kisha sambaza vizuri.

Nyunyizia limao juu ya huo wali, halafu funika sufuria, kisha pika biriani hiyo kwa muda wa dakika 10 mpaka 15.

Nyunyizia garam masala halafu changanya vizuri, kisha epua na upakue kwenye chombo safi, tayari kwa kula.